Athygli almannatengsl

Kanadíska jarðhitafyrirtækið Magma Energy (Magma), Orkuveita Reykjavíkur (OR), Hafnarfjarðarbær og Sandgerðisbær hafa lokið viðskiptum vegna kaupa Magma á 32,32% hlut í HS Orku. Magma á nú 40,94% hlut í HS Orku og þess er vænst að samningum um kaup fyrirtækisins á 2,16% hlut til viðbótar í HS Orku ljúki í mars á næsta ári. Ennfremur á Magma kauprétt á frekari hlut í HS Orku með hlutafjáraukningu að upphæð 15 milljón dollarar fyrir 1. nóvember 2011.

Kaupverðið á hlut OR, Hafnafjarðar og Sandgerðis í HS Orku er um 12,5 milljarðar króna og greiðir Magma um 30% kaupverðsins með peningum, eða um 3,7 milljarða króna, og afganginn með þremur skuldabréfum, samtals að verðmæti um 8,7 milljarðar króna. Skuldabréfin bera 1,52% vexti, að viðbættri hækkun á álverði, og greiðast upp eftir sjö ár í einni greiðslu. Áður hafði Magma keypt rúmlega 8% hlut af Geysi Green Energy og greitt fyrir hann rúmlega 2,5 milljarða króna. Kaup Magma í HS Orku er fyrsta stóra erlenda fjárfestingin í íslensku atvinnulífi í nokkurn tíma og munu hafa áhrif til styrkingar á íslensku krónunni.

„Ég er mjög ánægður með að við skulum hafa lokið þessum viðskiptum,“ segir Ross J. Beaty, stofnandi, stjórnarformaður og forstjóri Magma Energy. „Við munum nú einbeita okkur að því að auka orkuframleiðslu HS Orku um 230 MW fram til ársins 2015. Margir hafa verið efins vegna þátttöku okkar. Ég virði þau sjónarmið en er sannfærður um að flestir Íslendingar munu átta sig á því að þetta eru hagkvæm viðskipti fyrir Ísland.“

Ráðgjafar Magma vegna kaupanna á hlutnum í HS Orku voru Capacent Glacier og Glacier Partners, óháð ráðgjafafyrirtæki sem sérhæfa sig í almennri fyrirtækjaráðgjöf á Íslandi sem og alþjóðlega á sviði sjávarútvegs og jarðhita. Lögfræðistofa Reykjavíkur annaðist lögfræðilega ráðgjöf og Mannvit verkfræðistofa annaðist tæknilega áreiðanleikakönnun. Arctica Finance var ráðgjafi seljenda.

Capacent Glacier og Glacier Partners ráðgjafar Magma
„Samstarf Glacier og Magma er ekki tilviljunum háð. Sýn Ross J. Beaty á uppbyggingu jarðhitavirkjana fellur vel að stefnu Íslendinga í þessum efnum en starfsmenn Glacier, sem hafa margra ára reynslu á sviði jarðhitaviðskipta, störfuðu margir áður fyrir Íslandsbanka, og höfðu því góða þekkingu til að velja réttan aðila fyrir þetta verkefni,“ segir Magnús Bjarnason, framkvæmdastjóri Glacier. „Við óskum nýjum eigendum HS Orku og starfsfólki fyrirtækisins til hamingju með þennan merka áfanga. HS Orka er traust fyrirtæki sem hefur vaxið og dafnað undir stjórn Júlíusar Jónssonar forstjóra og Alberts Albertssonar aðstoðarforstjóra og þeir hafa, ásamt starfsfólkinu, byggt upp frábært fyrirtæki sem hefur allar forsendur til þess að vaxa áfram og dafna. Þar fer saman þekking og reynsla starfsmanna á byggingu virkjana, gott samstarf við sveitarfélög á Reykjanesi um aðgengi að jarðvarma og eigendur sem hafa aðgang að auknu fjármagni.“

Um Glacier
„Glacier“ samanstendur af Capacent Glacier og Glacier Partners, óháðum ráðgjafafyrirtækjum með 15 sérfræðinga á ýmsum sviðum fjármála. Félögin eru í samstarfi við Capacent á Norðurlöndunum og Pritchard Capital í Bandaríkjunum. Capacent Glacier er aðili að Samtökum fjármálafyrirtækja og hefur leyfi Fjármálaeftirlitsins (FME) til að veita fjárfestingaráðgjöf. Fjölmörg fyrirtæki á sviði alþjóðlegs jarðhita og sjávarútvegs eru viðskiptavinir félaganna. Flestir starfsmanna „Glacier“ unnu að viðskiptum Magma á Íslandi, m.a. Timothy H. Spanos, Hermann Baldursson, Charles Arrigo, Ignacio Kleiman og Jón Diðrik Jónsson. Upplýsingar um félögin er að finna á www.glacierpartnerscorp.com og www.capacentglacier.is.