Athygli almannatengsl

Binni í Vinnslustöðinni í Eyjum er maður dagsins í DV í dag vegna humars, sem VSV gaf hjálparsamtökum á höfuðborgarsvæðinu í vikunni og vegna myndarlegs jólabónuss sem starfsmenn VSV hreppa fyrir hátíðar. Starfsmenn Faxaflóahafna fengu yfir sig holskeflu fyrirspurna í kjölfar auglýsinga um verbúðir til leigu við Reykjavíkurhöfn. Í öllum tilvikum kom Athygli ehf. að því að kveikja eldana ...

Vinnslustöðin í Eyjum var nánast á hausnum fyrir um áratug og endurreisnarstarfið kostaði svita og tár, þar á meðal fjöldauppsagnir starfsfólks. Sigurgeiri Brynjari Kristgeirssyni, Binna, framkvæmdastjóra fyrirtækisins, og öðrum í stjórnendateymi fyrirtækisins, tókst hins vegar að skapa stemningu meðal starfsfólks, sem endurráðið var, og í öllu samfélaginu í Eyjum , fyrir því að reisa félagið við og styrkja stoðir þess til frambúðar. Skemmst er frá að segja að það hefur tekist með slíkum ágætum að verðskuldaða athygli vekur í öðrum héruðum. VSV er komið í hóp öflugustu fyrirtækja landsins og fjölgar starfsfólki nú í krepputíðinni á sama tíma og fréttir af samdrætti og uppsögnum einkenna því miður fréttir úr atvinnulífi landsmanna.

Tvennt gerðist allra síðustu dagana sem minnir landsmenn á sterka stöðu VSV. Annars vegar birti RÚV hádegisfrétt um  að fyrirtækið ætlaði að greiða fastráðnum starfsmönnum sínum 150.000 krónur á nef nú fyrir jólin, til viðbótar desemberuppbót samkvæmt kjarasamningi. Hins vegar kom  Binni færandi hendi til Reykjavíkur og afhenti Fjölskylduhjálpinni og Mæðrastyrksnefnd að gjöf 2.000 poka af humri, alls 900 kg, til dreifingar meðal skjólstæðinga sinna.  Báðum þessum fréttum kom Athygli á framfæri við fjölmiðla og gratúlerar mann dagsins og fólk áratugarins í Eyjum,  starfsmenn VSV, í tilefni árangurs erfiðis síns sem margir njóta nú góðs af á dreifingarstöðvum hjálparsamtaka á höfuðborgarsvæðinu.

Á laugardaginn var birtust auglýsingar frá Faxaflóahöfnum í Fréttablaðinu og Morgunblaðinu þar sem lýst var eftir leigjendum í verbúðir við Grandagarð og Geirsgötu í Reykjavík. Athygli ehf. sá um gerð auglýsinganna og framkvæmd málsins. Viðbrögðin urðu firnaskörp, mun meiri en ráðamenn Faxaflóahafna bjuggust við og þorðu að vona:

„Við urðum heldur betur vör við viðbrögð: látlaus símtöl og fyrirspurnir. Það hefur ekki verið annar eins ófriður við Reykjavíkurhöfn frá því handritin komu heim!“ segir Gísli Gíslason hafnarstjóri. „Auglýsingarnar frá ykkur í Athygli gerðu svo mikið gagn að það var eiginlega heldur of en van!“