Forsíða Fréttir Fréttir 2008 Landsnet undirbýr styrkingu og endurnýjun raforkuflutningskerfisins á Suðvesturlandi
Landsnet undirbýr styrkingu og endurnýjun raforkuflutningskerfisins á Suðvesturlandi Prenta út Senda hlekk á þessa síðu til vinar
Þriðjudagur, 02. Desember 2008

sudvesturl_021208Landsnet undirbýr endurnýjun og styrkingu raforkuflutningskerfisins á Suðvesturlandi. Framkvæmdakostnaður er áætlaður um 22 milljarðar króna á verðlagi í ágúst 2008 og mannaflaþörf um 380 ársverk. Drög að matsáætlun vegna framkvæmdanna hafa nú verið lögð fram til kynningar og er athugasemdafrestur til 16. desember næstkomandi.

Verkefnið, sem fengið hefur vinnuheitið Suðvesturlínur, tekur til meginflutningskerfis raforku frá Hellisheiði að Geithálsi og Hafnarfirði og áfram út á Reykjanes. Undirbúningur hefur staðið yfir frá árinu 2005 og varðar beinlínis 12 sveitarfélög og þar með meirihluta landsmanna.


Framkvæmdirnar í stórum dráttum
Meginflutningskerfið á Suðvesturlandi byggist á loftlínum en á nokkrum stöðum er gert ráð fyrir jarðstrengjum vegna tenginga við stórnotendur. Í heildina er um að ræða nýbyggingu á u.þ.b. 123 km af loftlínum og 17 km af endurnýjuðum línum. Nýjar tengingar orkunotenda og virkjana við meginflutningskerfið verða alls 34 km af loftlínum og 33 km af háspennustrengjum í jörðu. Ný tengivirki rísa á Hellisheiði, við Sandskeið, við Hrauntungur sunnan Hafnafjarðar og á Njarðvíkurheiði en tengivirki við Rauðamel verður fjarlægt. Jafnframt er gert ráð fyrir umfangsmiklu niðurrifi á eldri línum, eða samtals 96 km af loftlínum.

Áætlaður framkvæmdakostnaður er um 22 milljarðar króna, á verðalagi í ágúst 2008. Mannaflaþörfin er áætluð um 380 ársverk, skipt á fjögur ár, en stefnt er að því að framkvæmdir geti hafist haustið 2009 og að þeim verði lokið um mitt ár 2012. Þessar tímasetningar eru þó birtar með fyrirvara um breytingu.

sudvesturl_2_021208Drög að matsáætlun til kynningar
Framkvæmdin er matsskyld samkvæmt lögum um mat á umhverfisáhrifum. Vinna við matið er hafin og annast EFLA verkfræðistofa verkstýringu hennar fyrir hönd Landsnets.

Mikil áhersla er lögð á samstarf og samráð við sveitarfélög, landeigendur og aðra hagsmunaaðila, sem og leyfisveitendur og lögbundna umsagnaraðila. Drög að tillögu að matsáætlun hafa nú verið birt til kynningar og má nálgast þau á vef Landsnets, www.landsnet.is, EFLU verkfræðistofu, www.efla.is og á sérstakri heimasíðu verkefnisins, www.sudvesturlinur.is. Frestur til að gera athugasemdir við drög að matsáætlun, áður en þeim verður skilað inn til formlegrar umfjöllunar hjá Skipulagsstofnun, er til 16. desember næstkomandi.

Markmið og forsendur
Markmið framkvæmdanna er að byggja upp raforkuflutningskerfið á Suðvesturlandi til framtíðar svo það geti mætt áformum um orkuflutning á svæðinu, jafnt til atvinnustarfsemi og til almannanota. Núverandi kerfi er nýtt til fulls og annar ekki fyrirsjáanlegri eftirspurn á svæðinu í nánustu framtíð.

Styrking og endurnýjunin kerfisins er jafnframt forsenda uppbyggingar af ýmsu tagi í atvinnulífi landshlutans, þar á meðal aukinna umsvifa í orkufrekri atvinnustarfsemi, framleiðslu- og hátækniiðnaði.

Suðvesturlínur